ALEGACIÓNS E ALGO MÁIS...

Un Mosquito do concello, deume información valiosa dalgúns aspectos das recentemente presentadas alegacións....

En primeiro lugar confirmoume a asidua lectura que realizan deste blog membros da casa consistorial, tanto funcionarios coma persoal que só cobra....debo agradecer entón, a todos eles a fidelidade ao mesmo, aínda que creo que en moitas ocasións vos sentiredes demasiado protagonistas destas liñas, laméntoo, pero onde non hai auga podre...no hai mosquito que pique....

Por outra parte, contoume que a interventora está por solicitar un novo despacho, argumentando que no actual non cabe a cantidade de alegacións aos presupostos presentadas polos partidos, especialmente por CG quenes presentaron máis de 90....

Aquí debo facer unha reflexión, hai poucos días dicían dende ese partido que soamente debían axustar uns poucos flecos para chegar a un acordo..., máis tarde, votaban en contra destes no pleno..., e agora, presentan máis de 90 alegacións....si isto é coherencia...que alguén mo explique....

Cada día queda máis en evidencia a ruptura sentimental que vén acontecendo no noso concello....pero tamén cobra máis relevo cara a onde apunta a infidelidade....

Din que as louras son parvas, e eu mellor que diga o contrario se non quero que a miña muller me poña fóra de casa, o que si é notorio é que si un se mantén en silencio, sen facer moitas obxeccións, con perfil baixo e submisa á Tita, quizais gañe máis que facendo o contrario...

Case sempre detrás dunha loura hai outra loura, aínda que neste caso, houbo unha castaña, unha morena e ata un moreno, en fin para gustos hai acordos....

Acabo de recibir unha copia de todas as alegacións de todos os partidos, cando analice en profundidade todos os temas xa vos contarei, como sempre dende a miña óptica de Mosquito Capón...

REMATOU O PRAZO PARA PRESENTAR ALEGACIÓNS AOS PRESUPOSTOS

Atentos mosquit@s, hoxe rematou o prazo de presentación das alegacións aos presupostos locais, e segundo rumores dos meus mosquit@s infiltrados, darán moito que falar...

Observando detidamente os presupostos, non vexo soamente datos que necesitan ser modificados, senón máis ben, un labirinto de números que non cadran e unha infinidade de acochos con cifras infladas.

Iso si, todo feito cunha prolixidade e minuciosidade destacable, cosa que causou que investise numerosas horas no descrifrado deses xeroglifos contables.

Obsérvase así un traballo de formiga laboriosa para o encriptar máxico das contas....

Queda en evidencia finalmente, que os nosos Fantásticos saben pouco de cálculos, pero moito de disfrazar pistas para xogar á busca do tesouro....

Logo de votar en contra dos presupostos e argumentando variadas opcións, que farán agora os concelleiros da oposición ???

Que e cantas alegacións presentará cada grupo municipal logo de pronunciarse aparatosamente en contra destes, e con unha "batería de argumentos que xustifica o voto en contra" como dixo o BNG ???

Serán as alegacións un reflexo da PRODUTIVIDADE e COHERENCIA dos nosos edís ???

Poderemos observar dunha vez por todas se o PP local se centra no importante e deixa de quentar as cadeiras sen "producir máis que risa", (segundo os meus datos, 8 meses, 6 concelleiros = unha moción) ???

Cesará CG de gastar folios en mocións "Fariñentas" que nada teñen que ver co que acontece no noso pobo (Pobo Palestino) ???

Que fará o PSOE cando reciba as alegacións, seguirá encerrado no seu propio CUBO sen recoñecer que xa non son maioría absoluta ou recibirá novas ofertas sentimentais para chegar a un acordo de vida en común ???

Será acaso unha estratexia do PP non facer oposición, intentando así abrir as portas ao diálogo negociador ou so é incapacidade ???

Que farán os partidos políticos sen representación, polo menos se terán interesado por mirar os presupostos, aínda que algún@ non os entenda ???

Coidado concelleiros, o galanteo é como unha pastilla: ninguén pode predicir os seus efectos secundarios.

ROMANCE ROTO...

Dende hai pouco tempo, vimos observando como un incipiente romance comezou a romper...

A idílica unión que asomara entre PSOE e CG cando os salarios, parece estar a sufrir os ataques de certa infidelidade..

As malas linguas din ademais, que o terceiro en discordia sería o BNG co seu amable e disposto edil, quen estaría decidido a romper a como dea lugar a incipiente parella, para non perder o protagonismo que tanto ansía...

O romance que aparentemente terían iniciado no seu día PSOE e CG, tivo moitas citas nas que se viu acudir ao concello aos que supoñemos serían a súa fronte negociadora, coa concelleira á cabeza, e nas que os Fantásticos terían logrado con promesas falsas de namorados levar toda a auga para o seu costal...

Que aconteceu nese intre??

Porqué parecen ter rematado os paseíllos dos padriños da boda ao concello??

Que dote prometeron os Fantásticos, os que seguindo o seu constumbre do Gran  Prix, non cumpriron??

Que pedían os pais da noiva e que non estaban dispostos a ceder??

Que novas ofertas de consorte "EN REBAIXAS" recibiron os Fantásticos dende o BNG e estarían a estudar??

Intentarán os nosos Magníficos un matrimonio PSOE-PP como en Asturias??

Visto o visto, é evidente que:

-Se houbo acordo pre-nupcial entre PSOE-CG, ( cousa que non dubido no máis mínimo), cabe dicir que os Fantásticos quedaron co seu dote e deixaron á noiva..., leváronse os seus salarios e agora buscan parella de feito... 

Que opinará a vella gloria do partido, quen se viu obrigado a participar nas negociacións e aínda así non houbo casorio???

-As negociacións que terían mantido PSOE-BNG e que foron conxeladas no seu día para non sacrificar o Magnífico de Tráfico (cabeza que se pedía), pode que estean en vías de ser retomadas, polo menos é o que se espera dende a grande oferta horaria de dispoñibilidade que fixo o seu edil...Rodará a cabeza pedida??

-Mentres tanto no PP cobra cada día máis forza o voceiro veterinario, aproveitando que a deputada está a facer números e fotos para amarrarse á cadeira de Pontevedra como Tita Cervera ás árbores, faena na que conta co apoio da súa  Tita, vinda a estrela televisiva....E os demáis concelleiros solo cobran polos plenos??

-O PSOE pola súa banda, segue cobrando os seus salarios relixiosamente, a pesar de que no que levamos desta lexislatura o desgoberno é total, alí non hai nin paro, nin eres, nin despedimentos....

Pagan en cambio, salarios por "produtividade" aos seus empregados máis fieis, (pregúntome como medirán o que produce un empregado administrativo, será polos folios que gasta ou polas lamidas de calcetíns que fan?); mentres que os xefes cobran SEN PRODUCIR, para o pobo claro...

En fin estamos ante un concello que máis que gobernar parece estar a protagonizar un culebrón venezolano ou a coñecida canción de Pimpinella...Me engañaste....Me mentiches....

Cal será o próximo capítulo?? 

10.000 VISITAS!!!!!!! GRAZAS.....

Xa que o país está cheo de actividade política, de políticos, de cultura e de cultos, o Mosquito Capón pretendeu ser algo así como unha nova visión "moi persoal" da realidade, dende o chairo... (ou dende o meu voo).

O único que me motiva a facer este blog é a inmensa capacidade de exercitar o insersismo do que gozo hai poucos anos, deporte nacional e popular entre os da miña idade...

Solidarízome con todos aqueles que sexan perseguidos polas súas ideas ou a súa falta delas, excepción feita daqueles cuxas ideas só poden impoñerse matando as miñas, que son moitos, que están preto e que hai algúns aos cales o único que lles interesa é saber quen son... Para que? 

Para aquell@s aos que tanto importa coñecer a identidade deste mosquito, onde estou, que fago....decirlles...

Ante todo que son un escéptico positivista. Como é iso? Moi doado. O escepticismo é beneficioso pero ata certo punto, de aí que tambien sexa positivista, é dicir, vexo o mundo con escepticismo pero con ganas de que algo mellore, coa idea de que, no medio do barullo de imbecilidades que facemos a diario, algo sirva para algo. Non é moito pedir, ou si?

Vivimos épocas un tanto decrecentes pero sempre hai esperanzas...

No noso país houbo moitos cambios, para algúns, eses cambios son revolucionarios, algo así como o Edén na Terra. Para min, non, queda claro. …?  Traen rabo...

Entón, tento dende o meu lugar, poñer as cousas en sintonía, coa visión de "o que é unha pataca é unha pataca, e non unha fondue de camembert", e "o que é unha merda é unha merda e non un chanzo cara ao futuro".

Como ben dixo Lichtenberg: "Ojos como estiletes", (aínda que xa usen lentes os meus)... 

Todo aquel que non entenda o que trato de explicar pode anotarse no colexio nocturno que é gratuíto e coller os libros que non morden. ..

Ando só pola vida da escritura, a pesar de ter unha familia moi ampla e infinidade de amigos, pero non teño máis colaboradores que todos aqueles que fan os seus comentarios neste blog, aos cales se debe exclusivamente a cantidade de visitas que recibín...

Non estou coa dereita, nin coa esquerda, nin con ningunha outra localización espacial que non responda única e exclusivamente ás necesidades do común da xente.

Intento sinxelamente construír bocexo a bocexo, un sono de igualdade real de dereitos e obrigas para tod@s...dende a miña visión...

Acepto colaboracións sempre que sexan desinteresadas, fundamentadas, respectuosas e acordes coa intelixencia común.

Non publico nin publicarei xamais notas barriobaxeiras destilantes de veleno e mal gusto, a pesar de que algúns comentarios publicados fixeron certas referencias coas que non estou de acordo, pero cuxo estilo irónico paga a pena ver...

Intento soamente censurar os insultos e as incoherencias insás.... 

Finalmente desexo agradecer a todos e cada un dos que, coas vosas notas e dende os lugares máis insólitos como Rusia, Xapón, Filipinas ou Australia, facedes que este blog creza día a día...

Valoro e agradezo a asiduidade de lectura das miñas notas dende Alemaña, Bélxica, Estados Unidos, Brasil, Suíza, Inglaterra, México e por suposto de España....especialmente tendo en conta de que ESCRIBO EN GALEGO......(idioma que restrinxe enormemente a cantidade de público lector estranxeiro, pero que para ben ou para mal e con todo o meu orgullo, é o do meu berce...)

Falta como di a canción de Zapato Veloz que me lea un galego na Lúa, que visto o visto debe haber algún....xa chegará...

Reitero o meu agradecemento a tod@s os que cos vosos comentarios facedes este sitio, e recordade, acertados ou non, os meus escritos son soamente a miña vision persoal das cousas, estritamente a miña OPINIÓN...

Chegamos as 10000 visitas un martes 13...boa sinal amigos mosquitos!!!

Para reflexionar algunhas frases: 

( algunha un pouco vulgar, pero de irrefutable veracidade...)

As opinións son como os buratos no cu, todo o mundo ten un distinto ao do outro.

Cando deas unha opinion, dáa con fundamento, no caso contrario, deixarás á luz a túa ignorancia.

Onde todos pensan igual, ninguén pensa moito.

As opinións son como os cravos: mentres máis se golpea contra ellas,más penetran. (Alejandro Dumas)

O que non ten opinión propia sempre contradí a que teñen os demais. (Lingrée)

A opinión que os demais teñen dun é a atmosfera boa ou mala en que se vive. (Hebbel) 

OS 4 FANTÁSTICOS: A COUSA

Aínda que en España o coñecemos como "La Cosa"... noutros países chámanlle "La mole", eu digo, no meu guardés de toda a vida,"La Mole non mola"...

Como os demais Fantásticos, recibiu os seus poderes debido á tormenta de raios cósmicos da alcaldía que aumentou a densidade e resistencia do seu corpo, e que fai que o seu aspecto sexa similar ao dun ser formado de rocha

O seu aspecto estraño de cara de pedra, é para el unha maldición, xa que lle impide levar unha vida normal, e a diferenza dos seus compañeiros pasar desapercibido...

Adquiriu unha forza e resistencia sobrehumanas, á vista está que a pesar da infinidade de reclamacións de tráfico que se lle fan dende un local plumífero, "A Cousa" segue sen inmutarse, a punto tal de nin sequera dar resposta...eso si os dias de cobramento non falta pola casa grande....

A súa forza foise incrementando considerablemente dende entón, durante os seus primeiros anos de carreira, era case un INTOCABLE...actualmente a súa capacidade de forza non se definiu, non obstante é defendido a capa e espada polos outros fantásticos, será porque foi o único que aumentou os votos na súa zona de acción?  Será por iso tamén que as subvencións que se lle dan á Festa da Mercede son MUYYYYYYYY SUPERIORES as que se lle dan ás outras festas??? Será....será....

Os seus amigos fantásticos comentan que grazas a el aforramos moitos cartos, o problema é que esa situación non se ve reflectida nos presupostos que eles mesmos elaboran, onde irá a parar tanto ahorro fantástico????...

Pode resistir forzas explosivas tan grandes como a dunha bazooka sen recibir dano ningún. Isto quedou en evidencia cando ao longo de todos estes anos, vimos como o BNG pediu unha e mil veces un plan de tráfico, recibindo tamén infinidade de respostas, como " xa se encargou a unha empresa que o realice", pasando por "non hai partida destinada a iso nos presupostos deste ano" (nin de ningún), ata o silencio máis absoluto...pero sempre a nosa "Cousa" local permaneceu sen modificar a súa estrutura externa, nin sequera viñéronselle as cores á cara, claro como é de pedra...

Pode realizar unha actividade física intensa durante máis ou menos unha hora antes de fatigarse, sempre e cando esa tarefa se realice por algún bar de Galicia...

Mantén varias habilidades adquiridas antes da súa transformación, nas súas épocas de Citröen e cando era un simple mortal, entre elas encóntrase unha grande experiencia en combate man a man con vellas glorias partidarias e a capacidade de conducir moitos tipos de transportes, sempre a custa do concello claro...

O seu estilo de combate inclúe técnicas de boxeo, loita libre, judo,jujitsu, todo o que sexa necesario para librarse das queixas dos veciños que ven o descaro có que en épocas de crise hai os que manteñen o seu posto na alcaldía pero sen dar pau á auga....

Finalmente, o noso superheroe foi adquirindo ultimamente algunha das habilidades dos outros tres, por exemplo ten calidades de Invisibilidade, non se o ve por ningunha parte salvo nos plenos..., será que non pensará cobrar estes meses????, adquiriu como o Facho Humano, a capacidade de autoincendiarse, pero como aínda non tiña esta habilidade moi ben afianzada, quedou chamuscado ata os ósos..., está a intentar lograr as calidades de Mr Fantástico para esquivar o que vén, aínda que francamente non creo que o logre...

Acabo de decatarme de que o PSOE non ten só catro concelleiros......será porque nunca os tiveron en conta????... había concelleiras dalgunha área????... en fin...chego á conclusión de que os "Catro Fantásticos" nunca estiveron polo labor de formar a "Liga da Xustiza" e incluír aos outros superheroes, aínda que o prometeran,  cantos menos sexan para repartir...o poder...mellor, non é certo?

Que os temos de decoración vaia!!!...

OS 4 FANTÁSTICOS: O FACHO HUMANO

O Facho Humano incrementou os seus poderes cando os raios cósmicos da alcaldía bombardearon o seu corpo, a pesar de que xa dende moito tempo atrás viña propagando labaradas por todas as partes.

O seu carácter impulsivo, irascible, xocoso, soberbio e irónico, trata de ser encubrido cunha calma ficticia xa por todos ben descuberta...

Sente que posúe a capacidade mental para controlar a enerxía térmica do ambiente, cando en realidade é el só o que acende labaradas que moitas veces se volven no seu contra...

Pode xerar formas compostas de lume, aínda que en xeral emprega as súas palabras para "esculpir" as chamas como un lazo para atrapar os inimigos...

A chama do facho pode ser extinguida por materiais de asfixia, como a auga, area, escuma de extinción de incendios, as mantas resistentes á calor, e por actitudes intelixentes que fan cada vez máis evidente a súa chularía, prepotencia e falta de capacidade de xestión....

A saída de luz do facho é na súa maioría na rexión infravermella do espectro, e é invisible a simple vista, o que en cambio brilla a plena luz é a incompatibilidade entre altanería e soberbia, con ser un servidor público (cargo para o que se postulou e foi electo)...

Intentou de mil e un modos desfacerse de todos e cada un dos que no seu día foron bastións partidarios, entre eles a Festa do Monte, temendo o próximo declive, pero todo foi en vano...

Ultimamente e por motivos que polo momento me reservo, foi visto  tendo explosións de lume ata no ámbito máis próximo.

O almacenamento de gases licuados a presión por perder a maioría absoluta e sobrequecer polo accionar da oposición, fixeron que entre en ebulición e que o seu bleve afecte ao resto dos fantásticos...

A radiación infravermella da bóla de lume das mentiras que comezaron no Gran Prix e que rebotou cual búmeran, ten un alcance maior que o resto de efectos da mala xestión, e é a que causa máis danos.

A súa condición física (saúde, lesións, esgotamento) limita a duración da súa chama, cousa, que se vén facendo notoria en cada un dos últimos plenos...

Finalmente saber deste superheroe, que se é golpeado con pequenas cantidades de auga, ata uns cinco galóns, o facho pode convertelo en vapor con relativamente pouco esforzo e salvarse, pero se en cambio lle tiran con 21 licenzas, presupostos con partidas de diñeiro infladas, contas que non pechan e a Festa do Monte que ao final ninguén quere, non hai chamas que alcancen, nin vapor que non afogue....a punto tal de ter que pasar na actualidade de Facho Humano a Chisqueiro Allien...

OS 4 FANTÁSTICOS: MR FANTÁSTICO

Hoxe tócalle a quenda a Mr Fantástico, quen exposto xunto cos seus compañeiros aos raios cósmicos da alcaldía, sufriu cambios vertixinosos nestes anos...

Posúe a habilidade de alongar e cambiar todo o seu corpo ou partes del de xeito incrible.

Cambiarse a un estado super maleable, que lle permite estirar, comprimir, ampliar, deformar, alongar ou remodelar a súa forma física por vontade e á fantástica lonxitude de máis alá dos 500 mts, aínda que maiores distancias xa lle demandan un serio esforzo físico e non chega ata a VÍA aínda que o inviten a negociar...

El pode facerse así mesmo tan delgado como o máis fino papel ou converterse no suficientemente fino como o diámetro dun fío e pasar polo ollo dunha agulla, por iso do difícil que nos será encontrar unha agulla nun palleiro... sobre todo se os que o buscan son os que asistiron hai anos ao Gran Prix...

A súa forma maleable faino relativamente inmune á maioría dos impactos convencionais, por exemplo nos plenos está sempre rebotando as preguntas e cuestionamentos que lle fai a oposición, inmutable, sen que non quede nin unha rabuñadura, nin un aceno de turbación ou de vergoña...

Pola reestruturación das súas características, pode ocultarse a vontade, sobre todo en ocasións onde desexa desaparecer parar non ter que responder como no caso das 21 licenzas, os departamentos da pasaxe, ou algo máis recente como a discoteca...

Os reflexos e a velocidade de Mr Fantástico tamén están moi por enriba de limítes humanos, unindo a súa flexibilidade aos seus reflexos, pode esquivar obxectos que viaxen a gran velocidade, como por exemplo as multas polo temita das licenzas, págaas pero esquiva levalas á práctica incumprindo a lei...

É o líder dos 4 fantásticos e o home máis intelixente sobre a face da terra. A mente xenial que posúe fano un líder nato e un xenial estratego. O maior poder de Mr fantástico é sen lugar a dúbidas a súa mente extraordinaria (outra cousa é para qué a usa)...

A Tal punto chega a súa intelixencia e habilidade no xadrez da polítca, que todos cremos (ata el mesmo) que é o Español o que dirixe o grupo, cando en realidade é só o cabeza de turco que vai á fronte para levar os primeiros paus, mentres que Mr Fantástico vai á retagarda con cara do que manda é o outro, "eu son bó...eu son o mártir que paga as multas"...en primeira liña de lume nunca van os xenerais, sempre o fan os soldados rasos, os torpes pero brabucóns...

Unindo a súa intelixencia, flexibilidade e rapidez Mr Fantásticio pode enfrontarse a calquera inimigo mesmo a seres como o noso Dr Octopus (ou Polvo a feira) local que ten tantos brazos coma lle sexan precisos para atopar o que poida logo do lavado de cabeza partidario...

Así o demostrou ao longo da anterior lexislatura e no que vai desta, xa que despois de zorregalo en infinidade de ocasións, ilusionalo con negociacións que non chegaron a nada e burlarse del, aínda consegue que lle ofreza a posibilidade de conversar cando o desexe e ter o seu teléfono operativo as 24 horas por se decide negociar...un XENIO con maiúsculas noso Mr Fantástico....

Para reflexionar:

Non é que os politicos mintan, É QUE OS MENTIREIROS   ESTÁN A  GOBERNAR.

OS 4 FANTÁSTICOS: A RAPAZA INVISIBLE

A rapaza Invisible comezou o seu andaina como parte dos 4 fantásticos na anterior lexislatura.

Pero despois destes anos na Casa Grande, vémola un pouco deteriorada, por algo din que a política co-rompe, os desgustos turban a calquera, e fan sentir o seu peso no organismo de todo mortal....

Gustaríame esbozar un pouco as características que deron orixe ao seu nome, as máis destacables son:

-O poder que ten de volverse invisible mediante a desviación da luz ...este poder utilizouno para facer tamén invisibles partidas de diñeiro que van dun punto a outro e chegan a confundirse...

      Exemplo: Nos anteriores presupostos o Concello aparece aboando 22000 € de iluminación da Festa do Monte, pero hai algúns días ese gasto xustifícano verbalmente como parte dos gastos asumido pola Asociación que viña facéndose cargo da festa estes últimos años....amigos mosquitos os efectos que a rapaza invisible logra coa desviación da luz son extraordinarios, a luz da festa pasa de ser aboada por uns a ser pagada por dous....

-Outra capacidade que ten é a de xerar mentalmente campos de forza que utiliza como escudos para protexerse de calquera ataque...

      Exemplo: Mentalmente xera os campos de forza de modo tal que un sae do pleno despois de escoitar as súas explicacións dos presupostos sen desexos de atacala nin decirlle nin pío, xa que non nos decatamos de nada do que dixo e polo tanto saímos aparvados...

-Este mesmo campo de forza pódeo utilizar ao seu gusto para formar obxectos ou materiais, para mover ou levitar obxectos....

     Exemplo: A través deste campo é como fai os presupostos, forma os números das partidas, os ingresos levítaos ata onde os require, os gastos móveos cara a onde sexan máis politicamente correctos, en fin unha ganga....

A única dificultade é que como boa heroína invisible, pasa para todos nós case desapercibida, salvo en ocasións como estas nas que como o eixe principal do pleno foron os presupostos, é dicir o seu labor como concelleira da área, todos nos decatamos do seu estupendo traballo e uso dos seus poderes...

Como non podía ser doutro modo, a rapaza invisible é Houidini con faldras á hora de facer números...Ups, quixen dicir unha maga, Houidini era o rei do ESCAPISMO...

Moito e ben non o fai ninguén...

Calquera similitude coa realidade é pura ficción...